لاتخجل بعد

من طرف عادل الإثنين مارس 17, 2008 11:20 pm

لاتخجل بعد وكت الخجل مات
ولاتحتار أبد ماتسوه لتحير

گبل ماتحچي اعرفك رايد تروح
روح أحرگهن الدم والتصاوير

وإذا خايف البير يطلع اسرار
حته البير راح نذبه بالبير

عرفتك من الاول هدة إعصار
وتسد باب السمه بوجه العصافير

أنه مو جنح يمك ذبته الريح
بكيفك ينكسر وبكيفك يطير

مناشير أدري بيك وگلبي تابوت
وگمت ذبيت گلبي عله المناشير

أنه جبت الدروب مغمض وياك
وأدگ روحي عله گنطرتك بسامير

وجبتهه وياي عمرك تلف وتدور
وأنه عله تراب جدمك روحي تدير

وسلمتك عمر ماقصرت بيه
وگضيت العمر وياي تقصير

نواعيري انتهن چي مايك بعيد
الخلل بالماي مو صوچ النواعير

بمواعيدك بعد ماصلي للموت
صرت كافر وكافر بالمواعيد

عله جرفك عمر تانيت الهلال
وصل بس موت منك ماشفت عيد

صرت شاعر حزن واقرالك جروح
شمايگضي الجرح من وحده يعيد

وشيّب باب گلبي وبعده مقفول
وحته عله القفل طلعن تجاعيد

أجيب أول نفس خلصته وياك
وأجي بآخر نفس وتگلي شتريد

عصفوره عله بابك حطت الروح
زحمه تحشم عليهه المصاييد

بعد ماريد منك كلشي يفلان
بس رجعلي روحي وكلشي ماريد
بس رجعلي روحي وكلشي ماريد

[center]

من طرف khalid الإثنين مارس 17, 2008 11:55 pm

حلووووووووووووووووووووووووووووه
تسلم ابو احمد

لاتخجل بعد

لاتخجل بعد

رد: لاتخجل بعد