هضيمه

شسولفلك بعد من هاي الايام مصايب هلوكت حيلك تهده
خوه هلوكت صارت بالفلوس كله علطمع تركض مجده
عندك مال اصبح عندك اخوان جثيره كبال عينك مستعده
زمان وصار تحكم بيه الفلوس وصار الوكت لولاد المسعده
واذا حالك فقيره اتردد ونام وسولف ضيم كلبك علمخده
واذا عندك دراهم والوضع زين كله اتكوم الك دوم اتفده
وتجيك الناس كله اشكال والوان واحد للعشه وذاك يتغده
وذا مفلس تضل محد يمر بيك حته اعضاك من عندك تبعده
بعد ماتت الغيره وصارت الناس الغني بوجه الفقير الباب سده
ومن ينذر نذر مايعزم اضعاف يعزم وين ما واحد بكده
تدري جم يتيم بليلت العيد ينام ودمعته تلالي عله خده
مدري الناس صارت هيج مدري الوكت صاير هيج تاليته
اشو صار الفخر بالمال والماعنده مال امهلسه لحيته
وذاك العنده جم غران بين الناس عالي ومرتفع صيته
وذا رن الموبايل ينتفض مترين ويعدل اتواليته
كبل جانت الناس اتنام فرد فراش ربك جان يرزق كلمن ونيته
نشد انه من ابوي وكال جنه اصغار من اشعير محد يحصل ابيته
بس جانت عجيبه الناس اخوك ايكوم يضحك لو تعنيته
يابه الفخر مو للغني من يكرم الخطار الفخر بس للفقير الفرش للخطار مزويته