ابوذيات عله السريع

من كاس الصبر ظلت وشاله
الظهر محني وحمل همي وشاله
العتب لا مو عليه علي وشاله
وخشن كلبه ياوسفه عليه
.
.
.
العشك مو عيب بي رخصه واذن بي
ذنب الكلب موذنبج وذنبي
الكلب بي عين بي شفه واذن بي
شافج واستعملج صاح هيه
.
.
.
يدنيه التوبه لو احزن وهم بيج
الناس وي السنين اتمر وهم بيج
نارج تحترك بيهم وهم بيج
كومه رماد تذريه المنيه
,
,
,
انه ابن الصبر من صلبه وظهره
وابد ماكشف الحزني واظهره
اذا تموز مر كيضه وظهره
رمش العين انزله افياي اليه
,
,
,
اله اليل كله والضحه اله
اذا ماتدري حكه وضحله
كلبي الحب كلبه والضحه اله
ليش بلا سبب يصبح ضحيه
.
.
.
شنجاوبه العواذل لو سلتنه
خيط احنه وتره الشامت سلتنه
صفينه بلا عنب ضاعت سلتنه
وبقه بس الحزن مشتول بيه
.
.
نبع وجدان عذبني وجده
تعب كلبي تعب لمن وجده
علويه وتعابيني وجده
محمد والنسب الموسويه
.
.
.
لاتنشكد كثر زودي ولاكم
افيطن غيض لو واحد ولاكم
اصارع من يعاديكم ولاكم
وارد صاعين للي ايعل بي
.
.
.
انكسر باب الكلب بالغلك والفك
ليش بكل صلافه اتخون ولفك
تمنيتك تتن تصبح ولفك
وورثك من جمر كلبي بديه
.
.
.
نص شعرك عتاب وغزل نصي
وترانه بليل صوتك فدوه نصي
نص روحك برحي وبيك نصي
وهمت بيك بجنون وهمت بيه