ملينة منكم حمد

عارف مأمون






ملينه منكم حمد واحنه بقطار الموت
كل لحظه عبوه بكتر وارواحنه بتابوت



ملينه منكم حمد صارنه سبع اسنين

كل سنه يسوء الوضع ماشفنه منكم زين

اشردّنه منكم حمد بس كهربه وتموين

وشحّن علينه هذن لا كهربه ولا قوت

ملينه منكم حمد وحنه بقطار الموت

ملينه منكم حمد كلش تردّه الحال

ياكل كَشور الشعب واهل السياسه احوال
بس الحزن والقهر من عنده نبني بيوت

ملينه مكنكم حمد وحنه بقطار الموت

ملينه منكم حمد والله ملينه

كيّفنه طاح الصنم كَنّه استراحينه
جذاب ثاري الحلم وعلومه مو زينه

ما ندري معنى الحلم نصبح بحلك الحوت
ملينه منكم حمد وحنه بقطار الموت

ملينه منكم حمد من كلشي محرومين
ظلّت بعد عل الهوه وحتى الهوه مو زين

بالصيف نشبع قهر وبالشته بردانين
نشكي ولا ننسمع ياهو اليسمعه الصوت

ملينه منكم حمد واحنه بقطار الموت

ملينه منكم حمد بس الامل موجود
مادام حر الشعب يصبر بعد ويجود

ربك اذا يلتفت يكظن ليالي السود
بس المهم والاهم ما ينولد طاغوت

ملينه منكم حمد واحنه بقطار الموت
كل لحظه عبوه بكتر ورواحنه بتابوت

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

مع الاعتذار من الشاعر الكبير مظفر النواب
عن قصيدته الرائعه مرينه بيكم حمد

عاشت ايدك عله هاي التحويره موبس ملينه ومللللللللللللللللللللللللللللللللللللللللللللللللللللللللللللينه من هيج تجارمو حكومه
.
حمد يبني تره انه ويه الوكت كوم ,,,,,,,,,,,,, تلاوه وياي يبني وما لويته
ولو ظليت امشي بطرك الهدوم ............ بقه راسي سمه مادنكيته
حمد يبني تره الدنيه مدوم ,,,,,,,,,,,,, ولا كلشي تهدم ضاع صيته

تسلم الايادي على هذا الموضوع

حلوه بس تقهر على الحال الي وصله هذا البلد انشاء الله للاحسن