ابوذيات للحلوين

أريد أنصب عزا لنفسي واقيمه
بسبب مالي كدر عدكم .. وقيمه
كل الناس تاكل مرق .. قيمه
ومركة البصل حسرة علية

===============

شفت (عيونها ) الله واكبر
شبه العرموط بالبستان واكبر
اخاف لا يمضي على الدهر واكبر
وحتى الكلام هم يصعب علية

============

انا الابيض الك قلبي وصافي
قليل من البشر تحمل وصافي
يزعلونك علي وارجع وصافي
يظل هذا العهد للموت بية

=============

أنشدك عن شريك العقل وين صار
ما تدري عليه شكثر ون صار
لون لي بالعشيرة اخوان وانصار
عجل جان اندعو وياك بية

============

مثل جنح الفراشة شفاك وارقى
وربيع الشوق منك راد ورقة
كل بوسة منك حبيبي انطيك ورقة
واذا تحضني الك دفتر هدية

==========

شرط بية زماني شلون شرطة
رفض كل الشروط وفرض شرطة
غشيم البهالزمن اليحترم شرطة
حماة الوطن كلهم سرسرية

===========

يادهري حد سجاجينك وكرباي
شتالي بلاش ضيعته وكرباي
ترة راح اليجلي همومي وكرباي
وهموم زماني مرادم علية

==========

فصوص العين فص يمي وفص لك
يامن طيب انت اصلك وفصلك
اخيطك انا بيدي يا عمري وافصلك
واجيبك فيت يالترهم علية